我哋尋日寫過，下星期五啟程嘅立法會訪粵團驟起波折，四名泛民無證（回鄉證）議員揚言搞破壞，以反對「綑綁式」行程為由，威脅退團；點知唔夠廿四小時，泛民轉軚，聽完立法會秘書處講，話容許議員有兩個出發時間選擇之後，又話一定會跟團喎，仲會跟足全程添。講穿咗，即係收手唔敢再玩嘢！
立法會訪粵團四名「無證」團友，即係民主黨嘅何俊仁、劉慧卿、李永達同涂謹申，不滿被要求全程跟大隊活動，唔可以遲到早退，竟然揚言退團，仲上綱上線到話被人歧視，做團長嘅立法會主席焗住變陣，尋日由秘書長吳文華上內務委員會交代最新安排，話根據一視同仁原則，規定議員喺兩個時間出發，一係星期五下晝三點，一係星期六下晝五點，希望團友準時。
泛民無證議員成日呻無緣踏足神州大地，到有得去嘞，佢哋又搞破壞，依家訪粵團為咗佢哋全團「綑綁」出發，何俊仁四個如果三分顏色上大紅，唔識收手，肯定激起民憤，可能佢哋都聞到(火羅)味，所以尋日唔敢再玩嘢，仲忽然合群，聲言星期五會準時跟大隊出發。政客變臉，真係厲害過川劇大師。
泛民議員下星期一去中旅社攞回鄉證，佢哋話上到廣東，希望就不同議題同粵官員交流，好似六四事件，同「兩個權力中心」傳聞咁。吳文華順得人，話臨結束行程前一晚、即係十八日嘅晚宴，睇吓有冇機會加插座談。不過，能否落實，仍係未知之數。