本文重點
新一屆立法會勢力大洗牌，泛聯盟重新組合，無咗陳智思同呂明華，何鍾泰、石禮謙同劉秀成三缺一，於是拉合九龍西直選嘅梁美芬，改名專業會議，不過，新組合成員同床異夢嘅傳聞，屢有傳出，繼早輪梁美芬同何鍾泰喺雷曼小組委員會上公然嗌交之後，尋日又鬧出貌合神離嘅笑話。
團結得把口
專業會議尋日見財爺，講政府六月加碼「派糖」，之後出嚟見記者，何鍾泰特別為同成員公然鬧交一事澄清，話專業會議和而不同，又話佢一向好保護盟友，總之講到專業會議好團結。
何鍾泰嘅說話言猶在耳，點知到咗夜晚，梁美芬就以個人名義，向傳媒發新聞稿，標題以佢自己個名行頭，話見財爺逼港府加碼紓困，唔睇內文，仲以為佢單人匹馬上政府總部，同專業會議完全無關係。其實，一個組織團唔團結，外人有眼睇，當事人亦心知肚明！