本文重點
零售業吹淡風，但一個意大利名牌尋日照樣喺香港機場開設全球首間旅遊零售專門店，卓妮都貢去八吓，點知等到剪綵一刻，依然未有見到旅發局主席田北俊現身。奇怪？主禮嘉賓名單上明明寫上田少個名，但眼前貴賓就換上自由黨副主席方剛，何解呢？
細問之下，公關大員話，原來田少臨時決定去灣仔維景酒店探望即將獲解封嘅旅客，所以缺席剪綵。咁講法，方剛豈不是係「頂更」？卓妮走去同方剛求證，佢矢口否認，話自己貴為立法會零售界代表，梗要到場支持，身邊嘅機管局行政總裁許漢忠都幫埋口，話方剛係零售界猛人，夠晒分量剪綵。到底田少係咪搵人「頂更」，要問過佢至知。
卓妮轉頭捉住許漢忠，傾吓機場店舖生意有否受豬流感影響。佢坦言上月機場商舖嘅銷售額的確下跌咗十幾個百分點，下跌有多個因素，受金融海嘯衝擊都有啲關係，未必完全關豬流感事。問佢有乜計谷旺番個場？佢笑言呢排恒生指數係咁升，已經幫咗唔少嘞。言下之意，即係希望股市暢旺，市民買嘢自然鬆手啲。
傳授時裝業自保錦囊
方剛就嘆氣話，零售市道已步入嚴冬，尤其近月時裝業定單跌咗兩、三成，擔心嚟緊幾個月會爆發製衣廠倒閉潮。方剛家族生意都係經營時裝，佢傳授自保錦囊，教老闆們要睇實盤數、縮減皮費、舖頭唔好責住太多貨，希望盡快捱過嚴冬。