本文重點
教育局副局長陳維安係兩子之父，可謂有子萬事足，點知尋日佢去香港嘉諾撒學校視察學校嘅抗疫措施時，見到兩位女家長義工同兩個囡囡喺學校好親暱，不停互相揮手示意，忍唔住話自己恨都恨唔到，指兩位家長「好好彩」。何出此言？原來陳維安兩個十一歲及八歲嘅囝囝，每當家長日喺學校見到爸爸，次次都係「扮唔識」，手都唔揮一下，副局長都冇面畀，搞到佢好鬼無癮！
睇怕係家族遺傳
陳維安冇因此而怪罪兩個仔，事關佢話兩個仔咁做，睇怕都係佢遺傳畀佢哋，因為佢以前讀小學嘅時候，一樣唔鍾意爸爸媽媽去學校，覺得佢哋梗係去監視佢，睇吓佢喺學校有咩秘密，結果以前畀臉色父母睇，今日終於嘗到同樣滋味。
不過陳維安冇因為咁樣而減少去學校睇囝囝，佢話始終要睇吓佢哋喺學校做啲乜、表現點樣，愛子之心，溢於言表。豬流感分分鐘又殺到嚟，佢已經叮囑囝囝做好抗流感措施，減少與他人近距離接觸，沒有要求兒子戴口罩返學。