香港傷健策騎協會尋日喺君悅舉行周年晚宴，大玩懷舊氣氛，大會要求出席嘉賓以七十年代復古造型上陣，教育局局長孫明揚伉儷最貼題，孫太鍾小芬梳咗個「筷子姊妹花」鬆糕頭，孫公就着一件桃花色大領恤衫再加一條銀鏈，搞鬼到極！
卓妮尋日都貢去會場湊熱鬧，睇見孫公孫太真係嚇咗大家一跳，孫太笑言頭上髮髻係抄足當年紅極一時嘅「筷子姊妹花」，可惜佢搵唔到另一位姊妹一齊赴宴，暫時做住「One Chopstick」（一隻筷子）先。孫太揼本變身之餘，仲拉埋老公落水，靜雞雞為孫公揀咗套顏色夠晒「激」嘅桃紅色懷舊衫，孫公都話「非常驚喜」喎。講起嚟緊母親節點過，孫太大晒幸福話，子女會請佢食飯，一家人享受天倫之樂，羨慕死人。
白姐姐單拖心神恍惚
同場仲有才女白韻琴，白姐姐單拖而來，未見立法會議員老公謝偉俊（Paul）相陪。問佢阿Paul去咗邊？白姐姐扁嘴話唔知，睇嚟自從阿Paul傳出緋聞後，兩口子之間似乎冇乜溝通。冇咗阿Paul相陪嘅白姐姐顯得心神恍惚，自己應該坐邊圍枱都唔知，又話出門時連手提電話都唔記得帶，搞到要即場問相熟朋友借電話求救。平日精明嘅白姐姐，呢趟都算失魂囉。
卓妮