本文重點
任職八年嘅科技大學校長朱經武退休在即，但仍然把握與專家和學生溝通嘅機會。繼去年十月與諾貝爾得主楊振寧探討「物理學的誘惑」後，尋日又再討論「科學與文明對話」，點知楊振寧思考領域無邊無際，由物理研究談到張愛玲小說《小團圓》，甚至拉到子女問題，無所不談，在旁嘅朱校長就同台下嘅太太及楊振寧太太翁帆細心聆聽。
天才筆法千變萬化
楊振寧大讚張愛玲係個天才，寫小說寫得好獨特，加入咗西方意識流寫法，筆法千變萬化。楊振寧話自己與張愛玲係同時代嘅人，最欣賞就係張愛玲描寫舊時代大家族，令佢有夢一樣嘅回憶，特別係書中女主角睇住老竇吸鴉片煙嘅描述，令佢想起以前祖父嘅妹妹、佢稱呼為「姑奶奶」。楊振寧話，自己細細個就經常坐在床邊看着「姑奶奶」食鴉片煙，勾起佢唔少回憶。
楊振寧形容張愛玲遭遇係大悲劇，主因係張愛玲無看清楚呢個世界，如果揀啱入讀嘅大學，命運就會有所不同，不會孤獨終老，所以一個人有天分都未足夠，仲要對世界有所認識，而且腦筋清醒才會有幸福。楊振寧又提到佢三個仔由細到大都好聰明，但偏偏對數學無興趣，咁都唔緊要，做父母嘅最重要係及早發現子女嘅特質，先至能夠發揮所長喎！
卓妮