本文重點
風雲難測，宇宙浩渺難明，新任天文台台長李本瀅嘅任期問題，更加令人睇唔明！「黑英」林超英四月六日開始退休前休假，三日之後，李本瀅喺天文台官方網頁嘅《台長網誌》亮相，就以「台長」自稱，但係港府尋日宣布，天文台新台長嘅任期，由五月十一日先至開始。究竟過去一個月，李本瀅係做Ｐ牌台長、定係揸緊大膽車無牌駕駛？
足足早咗成個月
《台長網誌》顧名思義係天文台台長嘅官方地盤，外人不得沾手，黑英告別天文台台長生涯前夕，喺網誌以七絕一首寄語同僚，第一句就係「天心無盡奧難明」，估唔到呢句，成為佢嘅接班人任期不清嘅最佳寫照。
政府尋日透過新聞稿宣布，李本瀅將由後日開始，接替「黑英」做天文台台長，又話黑英已喺四月六日開始退休前休假。咦？咪住！李本瀅唔係已經做咗成個月台長嘞咩？翻查紀綠，李本瀅早喺四月九日，已經以八號颱風嘅氣勢登陸天文台台長網誌，佢話：「剛從林超英先生手中接過棒，立即便感受到來自各方的期盼。」又以未開嘅信封形容天文台嘅未來規劃，仲話茫然未有頭緒：「作為台長，在預備這些信封時，各方面都給我很多提示。」李本瀅講到咁明，仲唔係已經榮登台長之位？其後喺四月二十四日，李本瀅再喺台長網誌，整多篇「歷史為甚麼重要？」台長地位，誰敢置疑？
但係官員晉升，有規有矩，最終以政府嘅正式公布為準，到底李本瀅喺過去一個月，法定地位係台長，定係署理台長？係港府擺烏龍，定係李本瀅太心急？
其實，按官場遊戲規則，常人就算明知晉升在望，一日未落實，都心中唔踏實；就算大家明知非你莫屬，都打死唔敢認。梗係啦，一日未有官方公布，邊個會咁蠢搶住認，日後萬一甩轆，咪攞嚟瘀。呢套官場倫理，原來特區政府之內好多官員唔識㗎。
黑英行事有時令人意想不到，李本瀅做得接班人，都有番咁上下。尋日我哋訪問呢位新鮮出爐嘅天文台台長，佢話好多人以為颱風威脅生命，其實，行雷閃電一樣殺傷力強，所以諗緊點樣警告市民，提防閃電。李台長嘅意思，係咪叫大家要孝順父母，小心畀雷劈？