記者 梅可茵
佔地四十公頃、造價十三點五億元的曹公潭自然生態公園預計在二○一一年動工，為配合有關發展，荃景圍花園及籃球場將改建為生態公園出入口，而荃景圍遊樂場則改建為攀石牆、戶外繩網遊戲設施及汽車停泊處。
荃景圍遊樂場常客蔡先生怒斥「拆場」等同剝削居民權益，「個網球場好地地，拆咗佢唔單止浪費，到時仲要同人爭用市中心嘅網球場，想打波都幾難！」習慣在荃景圍花園晨運的黃太，早前才驚聞設施將會被拆，「我哋呢班老人家，好需要有個花園做吓早操、郁吓手腳，如果連個花園都冇埋，唔通要搭車落荃灣市中心啲公園晨運？」
區內共有逾五萬人口，現時休憩設施只有荃景圍花園、荃景圍遊樂場及柴灣角遊樂場。記者曾於平日及周末實地了解，發現荃景圍花園設施完備，內有休憩處及籃球練習場等；荃景圍遊樂場則有四個網球場及籃球練習場，柴灣角遊樂場的規模相對較小。
全區僅剩一小型遊樂場
「如果拆咗荃景圍遊樂場同花園，呢區就剩番一個柴灣角遊樂場，要打波肯定爭崩頭！」當區區議員王銳德坦言反對改建，並指居民如需使用荃景圍以外的社區設施，最少需步行二十分鐘，建議康文署為生態公園出入口及停車場另覓土地，否則便需重置拆除的休憩設施。王指出，○六年區議會討論興建生態公園時，根本未落實出入口及泊車區位置，「康文署話個公園可以吸引旅客喎，區議員梗係贊成喇，當時康文署冇提起要拆咁多社區設施！」
立法會民政事務委員會委員陳克勤警告：「冇理由夾硬拆走啲設施，如果康文署處理得唔好，市民嘅不滿情緒分分鐘會引發成官民衝突，到時就更加麻煩！」
無諮詢居民 學者促補鑊
「政府起大型設施前一定要做諮詢，我懷疑康文署做漏嘢！」浸會大學社會工作學系助理教授李建賢指出，外國政府規劃大型項目前必先諮詢當區居民意見，否則易招居民抗議。李建賢建議康文署盡快「補鑊」，諮詢民間團體，並保留原有地區設施。
對被指亂拆社區設施之指控，康文署發言人只解釋，荃灣區議會已於○六年同意將荃景圍遊樂場改建為攀石牆及汽車停泊處，地區設施管理委員會其後亦未有異議，該署會研究在區內其他地方重置原有或部分設施。