政情：夕陽政府扯白旗任人砌
煲呔曾領導嘅夕陽政府仲有一年任期，但係未夠鐘落台就已經亂象頻生，而且出現「跪低症候群」，遠嘅有慳電膽醜聞，較近嘅有交通津貼、派錢六千元，最新加入「跪低」行列嘅係政制及內地事務局局長「林D9」林瑞麟，佢喺各界猛轟立法會議席出缺替補機制違憲下終於「認衰」修訂。依家夕陽政府已步入無原則，只講票數嘅超弱勢政府，如果煲呔曾仲有多少同理心嘅話，應該買定多啲軟枕，等啲同僚日後需要「每月一跪」時都唔使「硬着陸」咁痛。
自吹自擂係政治家嘅煲呔曾，因「老懵董」喺○五年突然腳痛下台而坐正，及後喺○七年新一屆任期時，仲提出「強政勵治，福為民開」嘅施政理念，但過去幾年，煲呔曾其實係九流政治家，「狗噏」辯論佢就叻，一制訂公共政策就露晒底，○九年慳電膽醜聞相信大家都記憶猶新，煲呔曾喺施政報告提出慳電膽現金券，觸發明益親家嘅疑雲，最後有關計劃當然係不了了之喇！
自此以後，由煲呔曾領導嘅政府就「跪低成性」，仲將「跪低文化」蔓延至各個政策局，好似二○一二政改方案、停車熄匙、鼓勵就業交通津貼等，全部都難逃「跪低」嘅厄運。
踏入二○一一年，夕陽政府嘅「跪低」次數有增無減，變本加厲至平均每隔兩個月就跪一次︰二月底公布嘅「史上最廢」預算案喺全城鬧爆下，鬍鬚曾破天荒決定向市民派錢六千元，解決可能出現嘅憲制危機；五月份就增加私家車首次登記稅原方案「認衰」，提出包括調高環保汽油私家車稅務優惠等建議；及至七一前夕，在大律師公會與律師會等團體接連發表聲明，同政府就替補機制唱反調下，並要求政府撤回替補機制方案重新諮詢，一向面皮尺幾厚嘅林D9亦只可以迅速「跪低」。
傳商界「硬起來」反競爭法
既然大聲就能將政府壓倒，聰明嘅香港人自然會不斷要佢重複發生。據悉，商界準備就競爭條例草案「硬起來」向新任商務及經濟發展局局長蘇錦樑送上厚禮；地區人士亦非善男信女，一旦政府強推好似堆填區、焚化爐、骨灰龕等惹火議題，就會同政府搏命死過，睇怕夕陽政府未來都有得震無得瞓，最後要「每月一跪」嘅話相信都唔會令人意外囉！