旅遊界立法會議員謝偉俊同白姐姐嘅感情最近再現暗湧，繼早前阿Paul被指同一位「青島張茆」電郵傳情，上個星期又有周刊指阿Paul將白姐姐名下嘅多個物業加咗自己個名，並大字標題話白姐姐要向阿Paul查數，不過見慣風雨嘅阿Paul一直都冇公開回應有關指控。
兩人尋日終於首次一同公開露面，着晒情侶裝咁由中環坐船去長洲睇飄色，仲一齊食埋午飯，玩足成個下午先走，完全唔似鬧緊意見。阿Paul事後同我哋講，佢同白姐姐一齊咁多年，對於呢啲毫無根據嘅指控，一早睇到淡晒，所以唔會再作任何回應。
阿Paul又否認此行係有意借睇飄色闢謠，而係要履行佢作為旅遊界代表嘅義務，親身去考察呢項旅遊盛事。佢大讚近年嘅飄色活動有創意又兼備傳統特色，只要再改善吓現場嘅音響效果，增加多啲座位等旅遊配套設施，應該可以再吸引多啲遊客。佢建議主辦單位申請政府稍後推出嘅盛事基金，將明年嘅飄色巡遊搞大佢。
卓妮