本文重點
今季NBA季後賽東岸首圈異常激烈，繼塞爾特人與公牛展開Game 7終極戰之後，熱火尋日亦以98比72大勝鷹隊追成三比三，同樣要打足七場分勝負！熱火今場有「J奧」謝美奧尼爾因傷缺陣，得分點自然落喺韋迪身上，而「閃電俠」亦不負眾望個人轟入41分，再次單人匹馬拯救熱火。
為免提早畢業，熱火今場已無退路，一定要喺主場贏波先有價講，所以韋迪開賽後已擔起領袖角色，不斷起手希望盡快搶得領先優勢。激情澎湃嘅韋迪今場手風極順，第一節已攻入14分，協助熱火首節完結後領先32比18。
「J奧」或缺陣Game 7
鷹隊今役亦有中鋒荷福特因傷冇落場，所以內線亦冇乜甜頭，再加上兩大主力祖莊遜及祖斯史密夫都發揮唔出應有水準，前者13射3中、後者13射亦僅4中，投射命中率低開，成為鷹隊大敗嘅重要因素。去到下半場，熱火將分數愈拉愈開，第三節完結後已領先22分之多，最終熱火以98比72大勝一場，總成績追成三比三平手。
今場韋迪上演個人騷，攻入全場最高嘅41分，其中罰球17射16中狀態弗到漏，而後備入替嘅比亞士利亦貢獻22分及15個籃板球，若然「J奧」喺聽日嘅生死戰仲未ready嘅話，比亞士利就係最適合嘅頂替人物。
公牛綠軍收視破紀錄
另一方面，公牛對塞爾特人嘅史詩式「三加時」第六場季後賽，打破咗NBA史上首圈季後賽嘅收視紀錄，收視率高達3.5%，合共約有四百零四萬八千個家庭收睇，總收看人數超過五百三十五萬以上，認真巴閉！