金融海嘯餘波未了，幾時見底冇人說得準，有人覺得係時候買樓，起碼呢個時候多貨揀，有人就覺得睇定啲好。早兩日卓妮撞到福建幫頭領、旅港福建商會理事長盧文端，佢啱啱準備去灣仔幫商會睇個舖位，搵吓有冇投資機會。
卓妮講過，盧文端多得同為政協嘅田北俊送贈八二年極品紅酒Chateau Lafite Rothschild，從此愛上紅酒，去年底豪擲三百幾萬投咗批紅酒，佢講笑話，卓妮果然有好多捧場客，事關文章出街後，隨即有經紀打電話同佢推銷紅酒，有啲仲係Cold Call嗰隻，最後佢同位相熟嘅經紀買咗成十箱西班牙紅酒，但價錢平好多，每箱只係三千幾蚊，盛惠三萬幾。
唔投資股票
言歸正傳，盧文端做咗福建商會理事長轉眼兩年，商會旗下有三間中學，又買落唔少物業，但有個明文規定，就係唔可以做股票投資，所以今次喺金融海嘯中，商會喺呢方面冇損失，依家手頭上仲有八千幾萬現金，諗住趁樓市回落番啲，買物業做投資。佢話最近商會睇中灣仔一個仲有五年租約嘅舖位，開價逾二千萬元，應該仲有得傾；若然買得成，每年平均有百分之五回報，都算唔錯㗎喇！
中部搵商機
講開投資，盧文端啱啱帶咗七十六人嘅商會代表團，去安徽出席中部投資貿易博覽會，佢話中部六省起步慢，發展水平相當於十幾年前嘅深圳，有好多發展空間，淨係安徽就有七千萬人口。好似佢其中一個團員、信義玻璃主席李賢義咁，就拍板喺安徽蕪湖市開一間玻璃廠，佔地三十畝，咁大片土地，喺沿海省市及中國大城市，依家無可能搵到；有啲團員此行仲搵到房地產投資商機添。
卓妮