有架直升機喺前啟德機場上空低飛時，突然失控跌落嚟，咁啱得咁蹺撞正泊喺附近停車場嘅一架旅遊巴士，撞到車頭散晒，損毀嚴重。好彩架旅遊巴當時只有一個員工，所以連同直升機上兩人，只係得三人受輕傷，算係不幸中之大幸。一個唔好彩，好似台灣冧天秤壓到載滿乘客嘅旅遊巴咁，後果真係可大可小。
呢次旅遊巴畀直升機從天而降撞到正，算唔算係天降橫禍？表面上冇錯係橫禍，其實係人禍至真，正如車公靈籤所講：「禍去禍來因自招」呀！
睇相佬就話呃你十年八年，本報去年四月已經指出，呢個直升機場根本就係一個計時炸彈，可惜當局置若罔聞。本報報道，直升機成日喺嗰度飛嚟飛去，好多時要低飛掠過停車場，同地面相差大約兩、三層樓高，有時會左搖右擺，險象環生。
當時本報苦口婆心提醒當局，直升機唔應該太過接近人車聚集嘅地方，否則隨時都會爆單勁嘢。但係言者諄諄，聽者藐藐，民航處當係耳邊風，仲死撐話冇問題，話由於直升機係向海飛，既冇飛過高樓大廈，又冇飛過主要交通幹道等，淨係飛過隔籬嘅停車場係可以接受。
嗱嗱嗱，唔使十年八年咁耐，一年就見到喇，仲係成架直升機插入旅遊巴車頭，唔通咁都可以話係可以接受咩？係咪唔見棺材唔流眼淚，要死人至肯做嘢呀！
其實停車場同直升機場距離咁近，係人都知有問題㗎啦，咁基本嘅常識，連三歲細路仔都知道，奇就奇在負責規劃嘅地政總署同埋管理航空交通嘅民航處居然唔知有危險，真係講都冇人信。講到底，佢哋邊度係唔知有危險吖，係知而不做就真，原因好簡單，咪就係一個「懶」字咯！
呢次直升機意外只係冰山一角，話時話，香港嘅安全系數低到你唔信，潛藏嘅城市危機真係多過乜。
就講番舊年赤柱冧樹壓死人意外，事發之前，好多街坊已經反映嗰棵樹危危乎，要求當局防患於未然。但當局一於闊佬懶理，關人個關，結果搞出人命。最慘仲係，慘劇發生之後，當局仍然冇吸取教訓，各個部門卸得就卸，對危險枯樹依然闊佬懶理，卒之距離事發現場冇幾遠嘅市政大廈旁，月前又有一棵木麻黃樹冧咗橛落嚟。
計功夫茶話齋，信政府不如自求多福，出街唔想遇到意外嘅話，最緊要打醒十二分精神！