政府施政，應快就慢，宜急卻拖。大澳居民每逢風季雨季，都備受洪水威脅，然而，水浸重災區永安街、太平街及太平後街一帶，築堤防止海水倒灌，都話要等到二○一一年。老朽未知呢條堤是否如萬里長城般長，否則何以要拖到二○一一年？
政府高官一味愛做騷，颱風「黑格比」去年襲港期間，大澳水陸交通癱瘓，危村告急，高官搭直升機在高空盤旋，大澳在我腳下，手指篤篤，躊躇滿志，老朽為大澳居民高興，政府如此「高度」重視，明年（今年）就算海嘯都唔怕喇，何況小小的雨季。唉！殊不知日前民政事務總署署長陳甘美華，浩浩蕩蕩率領二十幾個政府部門入大澳，原來係為水浸預演，其勤政愛民，都算感天地、泣鬼神！
然而，一味預警有鬼用咩！「先知先覺」的任總夠話喺迷債危機爆發前預警咗多次啦！之不過又係出事。陳甘美華難道唔信歷史會重演？如此大陣仗做騷預演，居民都知幫助不大，更對天文台提早發出水浸預警成效提出質疑。老朽奉勸高官，不如開壇祈福更實際：天靈靈地靈靈，求雨季不再來，給大澳安寧！
高官若是真心實意愛民，如孔子所講的「仁者愛人」，便應不捨本逐末，加強力度督工，本着為大澳居民服務的精神，修橋鋪路，查找水浸主因，疏導溝渠，鞏固斜坡等等，這才是務實負責的做法！一味預警預警再預警，屆時洪水已淹至眼眉，大床漂浮屋外，鹹魚翻生游出窗外矣！
有論者指出，中國論孔孟之道兩千多年，那美妙的「仁政」始終蹤影全無，我們這個民族在論道上搞的花樣、耗費的無謂精力實在已經太多，倒不如紮紮實實的做點建設性的事。老朽覺得，就是不要形而上的論道。偶見一詩，正是此間高官的寫真：
要言妙道說千年，旗號新翻嘆聖賢。
最是千秋仁政夢，仍然似夢又如煙。