豬流感繼續威脅NBA！日前美國德州首度有人死於豬流感，呢個最為鄰近墨西哥嘅南部州份已全面響起警號，整個州學界運動賽已宣布停頓！而位於德州嘅休斯敦火箭及達拉斯小牛雖仍獲准進行季後賽，但因疫情正迅速蔓延，有指若美國未能控制疫情，NBA季後賽都會因安全為由，作出停戰決定。
學界賽停至月中
因美國首個豬流感死亡個案於德州出現，所以整個州份已進入緊急狀態，所有州學界運動賽事將會停頓至五月十一日，但職業球隊火箭則仍獲准繼續於主場比賽。NBA發言人法蘭表示：「我們會密切留意世界衞生組織指示，暫時並未有收到消息要停止賽事，但我們會確保每位入場人士都安全，一旦有任何變化，就會立刻作出調整。」
雖然賽事如常舉行，但據悉休斯敦市民人心惶惶，已有部分球迷表示暫時唔入場睇波，相信對火箭發揮亦有一定影響。
球迷拒入場觀戰
而小牛方面，班主古班亦已發出聲明：「我們會增強警覺，密切監視疫情發展。」基於德州疫情或會迅速蔓延，所以今季NBA季後賽不排除會因此而停戰。
至於東岸方面，鷹隊尋日於主場再下一城，以106比91大勝熱火，總成績領先三比二，只要明日作客贏波（周六早上8時開賽），就可晉級次圈對騎士。今場鷹隊有五位球員獲取雙位得分數字，包括射手祖莊遜奪25分及朗奴梅利入23分。而熱火主力「閃電俠」韋迪亦交到貨，個人攻入29分，只可惜最終亦單天難保至尊，處於落後局面。