本文重點
教育局局長孫明揚太太鍾小芬識烹飪就聽得多，但孫公煮餸就真係未聽過，佢尋日訪問天水圍循道衞理中學時，就喺課堂上向中三同學示範如何製作簡單嘅蒸雞及吞拿魚三文治。孫公着起圍裙，首先炮製隻雞，佢喺隻冰鮮雞上抹上鹽之後，再將葱放入雞肚，然後隔水蒸約二十五分鐘就搞掂。至於洋葱沙律醬吞拿魚三文治仲簡單，做法係將洋葱切碎，然後將沙律醬及罐頭吞拿魚撈勻，用作三文治餡料。
穿圍裙露兩手
唔好理冰鮮雞同吞拿魚三文治夾唔夾，孫公之所以着起圍裙即場露兩手，原來用心良苦，佢想學生學識炮製簡單食物，得閒整定放入雪櫃，當讀書讀到唔得閒出街食飯時，就喺雪櫃攞出嚟整番熱食，方便快捷，仲話佢同屋企人平時都有享用呢兩種食物。其實時代已經唔同，孫公一番好意，唔知有幾多學生領情？時下青年，如果要喺屋企煮嘢食醫肚，寧願用滾水沖一個杯麵，或者「叮」熱冰格裏面嘅雪藏點心。