愈來愈多高官選擇退休後重出江湖，退休三年幾嘅前統計處處長何永煊都技癢，尋日宣布加入新智庫香港集思會做策略委員會委員，專責做回老本行——計數，但佢講到明話唔會參政，亦唔會幫疑似特首候選人助選喎。
退休後嘅何永煊其實冇離開過統計學，閒來喺大學教吓書，今次有人請佢出山，實在樂此不疲。佢笑言以前雖然貴為處長，但工作以提供數據為主，甚少參與設計政府政策，依家不在官場，反而可以任意發揮，嚟緊會同集思會成員進行「腦震盪」，就經濟及社會問題出謀獻策，但講到敏感嘅政制研究，佢就話盡量唔會涉獵。
何永煊另闢新天地，但面對昔日舊同僚，仍然手下留情，問佢點睇統計處早前計錯數，令巴士票價調整機制錯誤啟動，何永煊處處維護話，呢次係不幸事件，統計處已經亡羊補牢，都算有交代喇。
講番集思會嘅陣容，新開張已招攬到三十四個顧問，包括前行會成員陳智思、前理大校長潘宗光等人。潘教授退休後，近日佢出席活動，派嘅新卡片銜頭係「理大榮休校長」，簡直同理大難捨難離。