本文重點
日本首相麻生太郎早前喺國會上發言，話釣魚台係日本固有領土，所以屬於《美日安保條約》嘅防衞對象。麻生呢番言論即時激起一班保釣人士嘅不滿，好似老牌保釣團體保釣行動委員會就決定喺下個月初前往釣魚台宣示主權，而新近成立嘅保釣大聯盟亦會喺下月三日發起保釣大遊行，到美國同日本領事館抗議。
前立法會議員「蔡菜子」蔡素玉係保釣大聯盟召集人，佢同一班「老保釣」都覺得，依家嘅年輕人都唔多了解釣魚台嘅歷史，所以決定成立呢個大聯盟嚟吸納年輕保釣新血，令保釣工作可以薪火相傳。
網上搞簽名活動
蔡菜子表示，依家已經搵到十幾個後生仔幫手籌劃活動，大聯盟仲會喺Facebook成立群組招兵買馬，而且仲會搞個網上「釣魚台上插旗」嘅簽名活動，藉此令保釣工作年輕化。
蔡菜子尋日講明，大聯盟暫時冇計劃出海宣示主權，一嚟係因為資源有限，二嚟係呢個舉動過去已經有唔少人做過。不過就佢個人而言，最主要嘅原因係「危險」，佢笑言：「我唔識游水㗎，去澳門都會暈船浪，點出海？」