工聯會領導層換屆，新任理事長吳秋北橫空出世，搶盡焦點，呢位工聯會「吳啟華」火速上位，其實涉及親中陣營嘅直選布局。據聞，工聯高層的確一度屬意副會長林淑儀任大總管，但遭會內一班同西環關係密切嘅元老極力反對，要求起用四十歲未到嘅吳秋北。
消息指，工聯高層的確有意擁立拍檔已久嘅林大姐，但知道阻力唔少，於是工聯內外，不斷有人對外發放「林大姐紮職」嘅消息氣球。工聯會領導層換屆當晚，會上多名「隱形」元老先發制人，一唱一和表明支持年輕人上位，林大姐因年紀問題無緣直選，就唔應該浪費三年時間。
其實林大姐一向與世無爭，今次佢順水推舟，斷然表明不競逐理事長，平息工聯會一場內部角力。
吳秋北上位，已非工聯家事，而係涉及整個親中陣營嘅直選勢力部署。二○一二年打後，立法會直選議席有增無減，親中陣營急需培植人才，擁有文學博士銜頭、外形相對討好嘅吳秋北，正好搭上呢架順風車。