經濟低迷，社會怨氣深，有電台趁機推出金融海嘯實況劇，講吓唔同家庭點樣共度時艱。劇集尋日搞記者會，廣播處長黃華麒都有份出席，佢自爆同家人捱過唔少苦，即使做咗處長，亦曾因為工作堆積如山，約親太太食飯都遲到粒幾鐘，幸好老婆係「開心果」，嬲一陣就笑番，否則唔知點收科。
正所謂家家有本難唸的經，如今高薪厚祿嘅黃處長，童年時亦曾窮到冇飯開，為幫補家計，做過小販及工廠童工。黃媽媽仲慘，本來係內地大學生，但來港後學歷不獲承認，惟有做泥工供養子女讀大學，所以黃華麒自小學識逆境自強，難怪佢後來執導電視劇集《獅子山下》時題材頗到肉，博得唔少共鳴。黃華麒觀察民間疾苦有一手，唔知佢見到金融海嘯衝擊香港經濟，會否技癢想執導拍番套香港人的心聲呢？
佢笑騎騎話：「我已經轉咗行喇，依家係做傳媒管理工作。」不過佢管還管，下屬今次提出想拍海嘯實況劇，佢話冇硬性要求對方一定要模仿佢套《獅子山下》，由得員工發揮喎。但話口未完，佢話退休後唔排除會執導拍番套戲，至於題材，就話多到講都講唔晒喎。