本文重點
墨西哥豬流感大爆發，更在美國擴散，香港作為國際金融中心，不少市民擔心會禍及香港，要好似○三年沙士爆發咁戴住口罩過活。雖然豬流感未殺到香港，立法會議員甘乃威已經聞風喪膽，日前摷番晒○三年沙士時用剩嘅預防裝備出嚟，相反「IQ博士」黃宜弘就未驚過，皆因佢話自己信教唔食豬肉，兼且遺傳基因有強勁抵抗力。
父母長壽 應該會遺傳
卓妮尋日喺機場博覽館一個活動上遇到IQ博士，佢話要有效預防豬流感，除咗政府要預備好疫苗外，市民生活亦要有規律，要多休息同多做運動以增強抵抗力，不過最重要嘅，都係遺傳基因。遺傳基因？IQ博士解釋，佢爸爸有九十六歲命，而媽媽現屆九十六歲依然健在，因而推斷出上一代嘅遺傳基因抵抗力強勁，所以佢話自己都會好長命，仲有排玩喎！
IQ博士有兩個仔在美國工作，問佢有否打電話去了解兒子嘅情況？佢好詫異話：「係都佢哋打電話返嚟問候我啦！」IQ博士兩個仔都係做醫生，分別係骨科及肝臟專科醫生，會懂得防禦流感疫情，所以佢一啲都唔擔心兩個仔嘅安全。
同樣有家人定居美國嘅自由黨主席劉健儀（Miriam），就話會打電話過去了解情況。問佢會否擔心囝囝劉偉釗喺嗰邊嘅安全？Miriam就話囝囝○三年喺香港，經歷過沙士，相信會有足夠能力應付今次豬流感疫情，佢仲話戴口罩預防都係其次，最重要係注重個人衞生喎！
甘乃威老化口罩「出土」
講番甘乃威，佢日前已經喺屋企摷番晒○三年沙士用剩嘅口罩及消毒液出嚟，盤點後發現百幾個口罩當中，有七十幾個橡筋老化，只有餘下大約三十個綁帶式口罩用得，而消毒液及濕紙巾又過晒期，被迫要報銷。
問到甘乃威會唔會提早補購預防裝備，佢就話港人好多時都會有羊群心態，一窩蜂去搶購物資，所以最好就睇定啲先至再打算。
卓妮