乜嘢叫做「在職貧窮」呢？喺以前嗰個年代，打工仔雖然搵食艱難，但辛苦得嚟至少有啲回報，最低限度有餐飽飯食，唔使飢寒交迫，算係比上不足，比下有餘啦。但依家嘅「在職貧窮」就唔同嘞，簡單嚟講，就係「雖然有份工，依然窮到燶」！
有工會組織最近做咗個調查，發現大部分連鎖快餐店員工嘅時薪平均只得二十元多啲，最低只係得十六元咁大把，唔單止冇半斤八両咁理想，簡直係出咗半斤力，只係攞番半両嘅咋！
係人都知香港交通費勁貴，好多小市民每日返工，搭車來回已經冇咗幾十蚊，唔食飯都要買個包吖，剩番仲有幾多，大家有數得計㗎。而且好多打工仔仲要應付大堆家庭生活開支，如果有幾件化骨龍等開飯嘅話，條數計極都唔掂。
話時話，如果話政府乜嘢都冇做過，又唔係幾公道，因為班懶官久唔久都會閉門造車度啲屎橋出嚟，話要幫助低收入人士噃。
好似話嗰個乜嘢「交通費支援計劃」吖，聽嚟似模似樣，殊不知淨係得個名，呢個支援計劃限制多過乜，既限住喺某啲區域，入息上限六千五百元，又有工時規定，幫啲唔幫啲，唔湯唔水，有鬼用咩！
另外喺○六年，政府諗住求其掟個「工資保障運動」出嚟，整色整水做番場大龍鳳，話就話等保安以及清潔工嘅工資有啲保障。點知部分參加工資保障運動嘅商戶認真鬼馬，政府話唔可以賤價請清潔工咩，佢哋咪將清潔工轉為「環保服務大使」囉。
「工資保障運動」混吉，畀人炳得多，當局先至死死氣話要就最低工資立法，不過，拖到依家，統計處仲喺度收集緊數據，都唔知何年何月先至可以正式立法。
嘥氣啦，本港就業人口超過三百五十萬人，統計處收集嘅六萬個樣本根本反映唔到實際情況，因為除清潔及保安外，好多速遞員、派傳單散工、臨時推廣員及便利店職員，人工一樣係咁奀，尤其係連鎖快餐店員工嘅平均時薪只係二十元，當局又知唔知吖！
做乜裝模作樣搞呢啲大龍鳳吖，政府作為全港最大僱主，帶頭搞咗最低工資好耐啦，好多政府部門將前線工作判咗出去就關人個關，外判商唔將工資壓到有咁低得咁低就奇咯。
仲有呀，唔好以為讀多幾年書有着數呀，政府似乎嫌「奴工」價未夠低，索性壓榨埋大學生，推出大學生實習計劃，「海嘯價」月薪只有四千元。冇計啦，成班高官月薪幾十萬，梗係唔知世界艱難！
計功夫茶話齋，工資低處未算低，再咁落去，遲啲工會再做調查嘅話，十六元時薪可能算高嘅啦。