轉眼間，張炳良已經做咗香港教育學院校長一年幾，仲搬埋入去大埔教院住。張炳良尋日喺傳媒飯局中，大讚教院有好多優點，空氣清新，交通又方便，可以話係全港環境最優美嘅校園之一，仲邀請記者齊齊入教院ＢＢＱ，親身感受一下添。
張炳良話唔好以為教院喺大埔就好遠，其實交通比想像中方便。好似佢自己咁，逢星期二就要去中環政府總部開行政會議，但都只需一個鐘頭車程，佢話香港好多地方出中環都係咁上下時間。呢年幾由大埔出中環開行會，張炳良話都只係有一次因為路上有車禍先至遲到，可見交通的確幾方便喎。
教院校長過去有個習慣，就係以早餐會友，同學生加強交流。張炳良做咗校長後，每個星期三都會同學生喺佢辦公室共進早餐。教院有一個與校長共進早餐嘅網上預約系統，張炳良話每個星期都有十個八個學生報名同佢食早餐，反應都唔錯；不過近排因為考試，少咗學生參加。咁有冇學生為咗食免費早餐而報名呢？張炳良就話，到目前為止，都只係得一個學生報過兩次名，仲有唔少內地同學參加，講吓喺香港讀書嘅苦與樂，反而政治話題就比較少講。