立法會喺啱啱過去嘅星期三為預算案表決開咗個馬拉松會議，搞到星期四凌晨兩點先散會，足足十五個鐘，真係難為呢班不再年輕嘅立法會議員。尋日喺立法會附近撞到李華明，望落去好似無咩精神咁，同平時笑笑口嘅佢好唔同。肥仔明話自己有鼻敏感，一捱夜就會發作，所以盡量都唔捱夜。不過個預算案搞到咁夜，卒之令佢鼻敏感發作，尋日立即去睇中醫，希望盡快好番。
鼻敏感雖然辛苦，但又唔係大病，肥仔明咁緊張好似有啲大驚小怪喎。肥仔明就解釋，咁緊張係因為佢聽日有個非常重要嘅約會。原來聽日係肥仔明嘅牛一，佢一早已經喺間好有情調嘅意大利餐廳訂咗位，準備同太太過二人世界喎。
肥仔明仲爆料話，佢前年生日因為要開會，趕唔切同太太慶祝，不知幾長手尾，卒之要出動到旅行先氹番太太。肥仔明今次學精咗，一早計劃好晒，又點可以畀鼻敏感破壞佢嘅大計呢。不過肥仔明身體又真係孱咗啲，難為佢同事ＩＴ豪譚偉豪捱完通宵仲要趕第二朝八點鐘船上南沙考察，難得一樣咁精神同我哋談天說地，肥仔明真係要向佢請教吓囉！