立法會議員近日為表決財政預算案搞到捱通宵，加上今屆會議又長氣又煩氣，議員要捱更抵夜，真係食乜都補唔番，立法會議員石禮謙早前就趁復活節假，去咗有「佛教聖地」之稱嘅山西五台山吸吓靈氣充充電。
大舊石前日現身香港會食飯，佢話五台山上佛寺林立，彼此各有建築特色，令佢呢位天主教徒都眼界大開，完全唔覺得同宗教信仰有衝突。最難得仲係有機會同女友及友人遠離煩囂，踏足寧靜嘅佛教聖地抖幾日，呼吸吓新鮮空氣，精神都為之一振，怪唔得佢面色紅潤有光囉。
不過，唔知係咪因為喺五台山食咗幾日素菜，個口有啲寡寡哋，見到大舊石前日手中攞住支紅酒，似乎啱啱同朋友暢飲完出嚟。其實大舊石一向識飲識食，而且最愛食雞，無論係燒雞、鹽焗雞定係白切雞，統統唔會錯過，就算獨自大擦一隻燒雞都面不改容。
石媽媽都係超級「雞迷」，大舊石為孝敬阿媽，經常去高檔超市買隻大燒雞，返屋企同媽咪撐枱腳，認真母子情深！