尋日我哋講到政府帶隊嘅珠三角訪問團唔夠人，搞到上星期六截止，上星期五下午仲搵緊人去，其中醫學會副會長周伯展就非常抵諗，臨時臨急同病人改睇症時間都要趕去參加，認真唔話得。
周醫生話自己喺醫學會負責中國事務部，當然要把握機會為業界爭取，今次有機會見內地高官當然開心，但更加想同內地對口單位見面，爭取來港醫病嘅內地病人留港時間由現時大約一星期延長至一個月，仲希望爭取病人親友都可以陪同來港，令香港發展成為中港兩地嘅醫療中心。
同周醫生傾緊偈時，咁啱商務及經濟發展局局長劉吳惠蘭路過，佢大讚周醫生係競步高手，仲啱啱喺上周日嘅「港鐵主席邀請賽」贏咗冠軍添。周醫生聽到後先笑笑口承認，原來佢早喺○六年已經贏過呢個邀請賽冠軍，當年大會請咗二○○○年悉尼奧運會競步金牌、馬家軍代表王麗萍教競步，佢第一次學競步，特登喺比賽前跟王教練學咗五分鐘，點知一跑就跑第一，唔知係名師出高徒定係佢天資高呢？