本文重點
政府統計處計錯加減乘除，連累到運輸及房屋局運算可加可減方程式都錯埋，市民滿心歡喜以為巴士有得減價，結果好夢成空。統計處處長馮興宏事後只係向公眾講咗聲「唔好意思」，搞到班立法會議員好唔滿意，尋日馮興宏負荊請罪上立法會解畫，有議員要求處長喺立法會正式道歉一次，馮處長拿拿臨向所有數據用家致歉，仲寫包單話唔會再犯相同錯誤，免得又再捱罵。本來簡簡單單道歉咪好囉，點知處長仲口輕輕承諾唔會一錯再錯；如果嚟緊計最低工資有乜差池，到時佢真係吟詩都吟唔甩！
統計處多年來嘅金漆招牌，因為一個前線外勤員工計錯數被打爛，市民睇住通脹率、失業率數字，都忍唔住問一句：「有無計錯㗎？」立法會尋日就邀請馮處長上去交代，除咗例牌炮轟一輪外，議員王國興仲要處長正式向公眾道歉。
馮興宏上得立法會，梗係早有準備，首先係自罪一番，話自己作為一處之長，員工同埋處方發表資料唔準確，佢一定要承擔。佢話同自己嘅同事會以今次錯誤作為鞭策，秉承專業操守，繼續為市民服務。讀完呢篇自罪書後，佢終於啲起心肝，向所有數據用家致歉，費事畀人鬧完再鬧。
話唔會計錯最低工資
馮處長道完歉，又猛咁話統計處已經採取一大堆措施改善，例如將人手運算改做電腦運算，仲會加強覆核。佢仲拍心口承諾，嚟緊做大規模嘅最低工資統計，一定會加倍小心，唔會再出錯，希望可以重建市民對統計處嘅信心。
處長寫咗張咁大嘅包單，好多人都戥佢心慌，事關統計運輸服務業工資指數，只係計一百幾十間機構嘅工資，計最低工資就數以萬間機構，隨時有機會計錯；若然到時處長真係揹正黑鍋，即使想卸都卸唔到。
有口痕議員就話，其實要鬧嘅唔係統計處，而係提供資料嘅運輸機構。事關市民申請綜援都要填到清清楚楚畀政府啦，但運輸機構就只係將啲原始資料求其交畀統計處，搞到班職員計到手軟，好易出錯，擺明裝彈弓喎。