本文重點
有「乒壇女王」之稱嘅中國前乒乓球奧運冠軍鄧亞萍尋日訪港，應霍英東家族第三代接班人霍啟剛邀請，出席「牛津劍橋協會」活動嘅嘉賓。霍公子與鄧亞萍同牛津及劍橋各有淵源，啟剛係牛津大學PEMBROKE COLLEGE經濟管理學學士，鄧亞萍就係劍橋大學經濟學博士，兩人聚首一堂，唔知會唔會擦出乜嘢火花？
卓妮呢排頻頻撞見啟剛，月中出席完博鰲亞洲論壇青年領袖圓桌會議嘅佢明顯瘦咗成個碼，尋日下午佢又拖埋細佬啟山現身立法會，以為係搵爸爸霍震霆食晏，原來係約咗立法會廠商會代表林大輝撐枱腳，同場仲有莊氏集團太子爺莊家彬、香港青聯副主席陳仲尼等。
大輝泊富豪二代碼頭？
呢個富豪二代組合頗新鮮，林大輝笑言唔係想泊公子「碼頭」，而係早前同香港青聯一齊搞就業招聘會，彼此惺惺相惜，索性聚埋合組兄弟班。大輝請公子們食西餐包括燒大蝦同沙律，菜式頗簡單，但佢話大家唔志在食，全程「腦震盪」為主，唔排除暑假搞多一次大專生就職招聘會都未定。
啟山倡青訓口脗似小霍
大輝又話，席間同啟山最好傾，原來啟山係小型足球總會會長，同佢一樣熱愛踢波，啟山又提出香港足球場地嚴重不足，提議搞多啲青訓，口脗似足佢爸爸，睇嚟小霍教仔都有番咁上下。
食完飯後，啟剛馬不停蹄趕下場，原來係趕去迎接近年甚少喺香港公開露面嘅乒壇超級一姐鄧亞萍。卓妮以為佢相約萍姐切磋球技，原來即將出任「牛津劍橋協會」下屆會長嘅啟剛，誠邀鄧亞萍出任協會活動嘅嘉賓，分享吓人生經驗，認真夠面子！
係人都知，萍姐當年喺乒壇吃盡苦頭，九七年退役後隨即開展十一年求學之路，由一個英文字都唔識，到曉得用英文完成博士論文，更先後喺清華大學、英國諾丁漢大學及劍橋大學進修，學成歸來後，專注為年輕人解決困難，日前更走訪北京青年創業示範園，萍姐同啟剛都有志推動青少年就業，怪唔得可以一拍即合！
卓妮