政情：鄧國斌叫鄧爾邦要執番正

審計署前日公布衡工量值報告，狂數平機會大花筒多宗罪，仲踢爆平機會自把自為幫主席鄧爾邦買人壽保險。審計署署長鄧國斌尋日上電台話，平機會好早已經幫主席買壽險，唔係今屆主席嘅獨有福利；佢無睇過以往主席聘用條件，但總之現任主席聘用條件冇包壽險，特首都冇批過佢買壽險，林瑞麟做局長嘅政制及內地事務局負責監管平機會，梗係要佢嚟執番正喇！