有立法會酒仙之稱嘅議員黃宜弘，喜歡飲茅台就係人都知，佢講開政府中有人同佢有得揮，佢多次盛讚商務及經濟發展局常秘蔡瑩璧（Yvonne）係政府兩大酒筲箕之一，連酒仙黃宜弘都咁推崇，Yvonne嘅酒量應該好犀利。
尋日Yvonne同立法會議員譚偉豪大家傾開，「I.T.豪」都話聽過Yvonne呢個朵，原來酒筲箕呢個朵，係佢當年喺工商局做嘢時得番嚟嘅。話說○一年Yvonne統籌嘅第一個大型考察團，就係去大西北，足足十幾日咁耐；去到最後一日，新疆自治區書記王樂泉非常好客，要求香港方面派位女將出去飲酒，Yvonne惟有頂硬上。
佢憶述話，當時隻杯酒雖然只係半滿，但酒精高達五十幾度，認真唔講得笑，在場嘅除咗佢之外，仲有依家做咗行會成員嘅楊敏德、同埋當年仲未入政府嘅廖秀冬。
Yvonne話，呢兩位女將都好飲得，不過Yvonne謙稱話，唔知大家點解咁睇得起佢，搵佢出去飲，結果一飲成名，從此有政府酒筲箕呢個朵！不過Yvonne話，飲完佢個頭不知幾痛，所以呢啲都有代價㗎！