美孚荔灣街市內設有起卸區，但長期被街市檔戶佔用擺放雜物，經常在該處上落貨的黎先生不滿食物環境衞生署坐視不理，「趕落貨啲貨車塞到出行人路，行人又畀啲車逼出馬路，食環署究竟有冇做嘢！」記者查證時發現，近千呎的起卸區，三分之二的範圍被放滿紙皮、發泡膠箱及貨物等，僅留下中間通道可供上落貨。
當區區議員沈少雄強烈要求食環署加強巡查，免情況惡化，「起卸區只係用嚟上落貨，唔應該長時間擺滿嘢！」儘管證據確鑿，但食環署發言人卻表示，接獲投訴後，於四月初派員突擊巡查，發現起卸區運作正常，並表示已勸喻商戶卸貨後盡快移走貨物，以免阻礙其他使用者。