講起嚟真係一額汗，你知啦，假如預算案被否決，好大件事㗎。根據《基本法》有關規定，如果預算案無法通過，特首可以解散立法會進行重選，假設重新當選嘅議員再一次否決預算案，到時特首就要炒魷魚。簡單咁講，否決預算案係一次好嚴重嘅憲制危機。
正常嚟講，預算案係冇乜可能否決嘅，不過今時唔同往日，金融海嘯吖嘛，經濟衰退吖嘛，堂堂全港最大銀行滙豐啱啱先至裁員百人，當然個個都希望預算案救市救人啦。偏偏香港出咗一個孤寒財爺曾俊華，交出一份不得人心嘅預算案，救市唔夠力，救人唔到位，搞到好多議員齊聲反對。如果，立法會反對票多過贊成票，一嘢扑冧預算案，咁就驚天動地咯，香港將會大地震！
好彩，曾俊華救市力度弱雞啫，原來佢箍票識得食大力菜，事前死箍爛箍，終於畀佢箍掂三十三張支持票，預算案二讀通過，三讀問題不大。之不過咁，三十三票其實係香港回歸以來歷年最低票數嘅其中一次，另一次係○三至○四年度前司長梁錦松嘅「加稅預算案」，得票同樣係三十三。至於反對票咯喎，曾俊華就創造咗一項新紀錄嘞，當年梁錦松得到二十一張反對票，鬍鬚曾嘅新紀錄係二十二張！
支持票平咗最低紀錄，反對票創咗最高紀錄，呢份預算案的而且確係「史上最衰」。
險過剃頭低票過關嘞，唔使累到老頂執包袱落台嘞，你估曾俊華點講呢？佢話喎，有需要嘅時候將會毫不猶豫推出適當措施。
功夫茶有時真係唔明高官個腦係點運作嘅，乜嘢叫做「有需要嘅時候」呢？曾蔭權前一排先至親口講過，香港正面對自從二次世界大戰以來最嚴峻嘅挑戰，經濟收縮嘅程度，相信會比政府早前估計嘅百分之二至三更厲害。好嘞，如果你問，幾時有需要救市，功夫茶可以大大聲同你講，家陣就有需要！今日就有需要！即刻就有需要！
可惜吖，面對議員要求加大力度刺激經濟，鬍鬚曾一於當耳邊風。佢仲話喎，唔同意議員嘅講法，政府提出嘅刺激經濟方案，佔本地生產總值百分之四點二，已經係有史以來最大嘅刺激經濟措施，力度唔比其他政府弱。
唉，打個比喻，有人忽然之間心臟病發，理論上梗係急救㗎啦，醫生居然話：有需要嘅時候我先至去救你。如果病人抗議，認為醫生見死不救，醫生仲要砌詞狡辯：喂，我唔同意你嘅講法，我已經出咗百分之四點二嘅功力救你，係我有史以來出得最大力嘅一次，你唔可以咁樣冤枉我！
點都好啦，計功夫茶話齋，財爺呀財爺，咪以為預算案避過否決一劫就可以鬆一口氣，你再係咁孤寒成性，救市仲係咁軟弱無力，死都唔肯加碼救人，小心下次出現落台危機嗰個係你！