金融海嘯下唔少公司都損手爛腳，保得住唔使裁員減薪已經好好，仲可以捐錢嘅真係唔話得。喺逆市營業額仲有增長嘅莎莎國際主席暨行政總裁郭少明同夫人，最近就捐咗八位數字、即過千萬元畀嶺南大學，聽聞今次都算係嶺大近期收到嘅最大筆捐款，今日校方仲會正式舉行捐款典禮，由郭少明親自送張大支票畀嶺大校董會主席陳智思同校長陳玉樹。
唔講唔知，原來郭少明同嶺大好有淵源，去年嶺大就頒授咗個榮譽工商管理學博士學位畀佢，大讚郭少明除咗係一個出色嘅企業家、仲成功帶領莎莎成為全港五大零售集團之一外，仲熱心慈善公益，又深明教育係社會發展嘅基石，所以佢尤其關注教育事務，希望可以回饋社會培育下一代。
其實郭少明一向出手好闊綽，上個月佢就喺會展豪擺一百五十圍，請客仔食飯之餘仲慰勞埋啲員工，又攞埋啲客仔贊助嘅百幾萬禮物，搞抽獎激勵員工士氣，嚟緊仲話會檢討員工嘅薪酬同花紅，實行獎勵員工有錢齊齊搵！