香港最大老牌工會工聯會日前換大管家，吳秋北以三十九歲之齡當選理事長，喺愛國愛港陣營都算係一支奇葩。吳秋北喺工聯兄弟之間有個花名叫「吳揪得」，即係唔打得，同佢官仔骨骨嘅外形，相當配襯。前日工聯會會長鄭耀棠率一班新領導層見記者，結束之後，唔少人都覺得，吳秋北應該多一個花名，叫「吳Talk得」。
工聯會領導層新鮮出爐，梗係想同傳媒打吓交道啦，老江湖棠哥挑通眼眉，講幾句開場白，就將支咪交畀吳秋北，畀機會佢同大家講幾句。吳秋北初試啼聲，全場屏息以待，諗住洗耳恭聽佢嘅工作大計，但係攻讀緊中國社科院文學批評博士嘅吳秋北，果然好有古代文人嘅內斂謙恭風範，佢謙稱自己過往少與傳媒交手，希望大家以後多啲報道工聯嘅消息，只係幾句客套說話，跟住就出現「Dead air」，搞到聽慣政治人物侃侃而談嘅記者，個個都有啲失落。
棠哥見到咁嘅場面，都忍唔住搶咪，提醒吳秋北講：「喂，你叫大家報道多啲，你都要講多啲先得㗎！」工聯新大管家睇嚟要練吓把口至得嘞。