遇着金融海嘯，大學撲水亦要各出奇謀。新上場嘅理大校長唐偉章就準備破格粉墨登場，嚟緊禮拜六（廿五日）喺紅館開Show，官仔骨骨嘅佢將變身Band友彈電子結他，仲好秘密咁作咗首歌獻畀大家。唐校長人稱理大「秋官」，莫非佢真係想撈埋演藝嗰瓣？
場演唱會係同人氣歌星古巨基合作，名為「古巨基Eye Fever理大慈善演唱會」，唐校長登台果然夠晒號召力，當晚八千幾張門票經已全部售罄，合共籌到幾多錢就要再計計數先知。
唐校長話晒「處男下海」，點都要做足準備工夫。據聞近日佢忙於同四位理大學生夾Band練結他，又極速作好一首歌，將會喺開Show當日首次彈奏，可惜唐校長惜口如金，今次唔會開金口唱歌，留番下次再顯身手都未定喎。梗係喇！依家經濟不景氣，籌款工作可謂舉步維艱，唐校長將絕技逐啲逐啲表演，咁至籌得更多，唔知佢會唔會考慮請埋同佢生得好似樣嘅秋官鄭少秋同台演出呢？