立法會尋日表決財政預算案，雖然大家早已估到一定夠票通過，但有議員表決前夕仲大跳草裙舞遲遲唔肯表態，加上政府自製恐慌，搞到全城都金睛火眼
實個投票，卓妮尋日都有貢去湊熱鬧，睇吓班立會議員嘅眾生相。
實個投票，卓妮尋日都有貢去湊熱鬧，睇吓班立會議員嘅眾生相。
小霍西裝褸襯運動褲
財爺鬍鬚曾可能怕攞到嘅反對票破咗梁錦松紀錄，出盡政府狗仔隊為佢箍票。卓妮發現，立法會每個主要出入口都有狗仔隊守住，以人盯人策略去箍票。二讀投票時有三個議員冇出席，霍震霆直到下午兩點半先到立法會，仲以西裝褸配運動褲嘅奇特打扮現身。佢同卓妮講尋日朝早去咗廣州出席東亞運活動，之後即刻趕返嚟三讀投票。問佢係咪畀政府催到連褲都換唔切，小霍只係笑而不答。
除咗小霍畀預算案搞到鬼咁狼狽外，工聯會黃國健（KK）都要拎埋行李去立法會，諗住一投完票就飛去澳洲參加囝囝畢業禮，KK心知趕唔切觀禮，所以已經買定部新款微型手提電腦送畀阿仔賠罪。點知有七名議員今日要去工商界訪粵團，要求無論開會開到深夜甚至翌日凌晨，點都要等佢哋投埋票至完會，搞到KK又要改機票，今日才可以起程去澳洲。KK話：「依家仲諗緊橋氹番老婆。唉，要慢慢兌現支票喇，之前話咗陪佢去東歐、日本都冇去……」睇嚟政府要還KK呢份人情債都有排還喇！
講到班高官，當鬍鬚曾二讀發言時，三司十二局一如既往都有現身撐場以示團隊精神，不過今年就顯得特別失禮。首先係政務司司長、林瑞麟同邱騰華齊齊遲到，更誇張嘅係，周一嶽、孫明揚同劉兆佳聽聽吓鬍鬚曾發言竟然瞌眼瞓，李少光、林鄭月娥就間中閉目養神，陳家強更加邊聽邊疑似摳鼻「採礦」，卓妮真係睇到都眼冤！
成眾矢的蘇錦樑黑面
尋日二讀一過，班局長就拉隊走人，換上副局、政助喺度撐場，結果商務及經濟發展局副局長蘇錦樑（Greg）成為眾矢之的，議員無論講乜議題，都借阿Greg 單Show卡片事件借題發揮，搞到佢黑面皺眉，認真冇癮！
卓妮