本文重點
鬍鬚曾份劣評如潮預算案，尋日終於來到投票表決一刻。之前紮馬起弶，擺出一副反對預算案姿態嘅立法會議員，喺有人全力吹雞之下，最終亦硬淨唔嚟，做晒軟腳蟹。本來，預算案二讀表決時，飲食界張宇人（Tommy）同勞聯李鳳英缺席，一度掀起高潮，以為親建制陣營真係有人敢公然向鬍鬚曾掟雞蛋？點知結果令人失望，Tommy、英姐中午自動現身，之前一直對支持預算案扭扭擰擰、唔肯屈服嘅旅遊界謝偉俊同「怪醫」梁家騮，亦全部歸晒位，變身護航部隊。
鬍鬚曾份預算案全城噓爆，硬接二十二張反對票加一張棄權票，打破梁錦松喺○三年攞廿一張反對票嘅紀錄，呢樣都算係意料中事，「根哥」黃容根連腳骹手術都唔做，「KK」黃國健甘冒同老婆離婚危機、連個仔喺澳洲嘅大學畢業禮都願意唔出席，大家一早估到民建聯同工聯會投支持票，所以尋日嘅焦點，就落晒喺幾個最有機會唔賣港府帳嘅議員身上。可惜，佢哋最終逐一做晒軟腳蟹屈服，不同之處，只係投降時間有先有後，同埋下台階有高有低之分。
喺非泛民議員之中，怪醫梁家騮本來係被睇好最有吉士向預算案投反對票嘅人，佢早前對投票立場三緘其口，鐵筆都撬唔開，理由係要聽過鬍鬚曾篇致辭，先至作終極判症。但現場所見，議會一開波，鬍鬚曾講嘢，怪醫大部分時間都唔喺議事堂，一入嚟就投下贊成票，真係打針都無咁快，暴露佢尋日行入立法會，褲袋已經袋定張支持票。
另一位對預算案投票立場一直保持神秘嘅議員謝偉俊（Paul），全場留守議事堂，鬍鬚曾份足版致辭，佢一字不漏聽晒，但最終同怪醫一樣，投咗支持票。律師出身嘅佢解釋，法官都要聽完結案陳詞，先至判案喎，強調自己唔係跳草裙舞。
肥仔張英姐三讀歸位
喺怪醫同阿Paul雙雙歸降嘅映襯下，Tommy、英姐缺席二讀表決，簡直就係親建制陣營裏面嘅雌雄奇葩，肥瘦雙俠，但正當大家仲喺度計緊票之際，Tommy、英姐喺中午時分相繼現身，原來Tommy開公司董事會開遲咗，英姐就啱啱喺醫院驗完身，公然「反曾」，只係美麗的誤會，佢哋人一到，就表態話支持預算案，到三讀表決時，睇怕都唔會令人意外。
對於幾位議員扭完一輪計之後，最終都要乖乖歸隊。「3L」林健鋒忍唔住講風涼話，佢都有啲牙痛，想唔投票，去睇醫生；言下之意，暗寸有啲同僚其實喺度跳緊草裙舞。