馬丁路德金嘅夢想，終於由美國黑人總統奧巴馬實現咗，香港嘅夢想呢？有幾多個實現？嗯……中藥港，冇咗；鮮花港，冇咗；時裝中心，冇咗；數碼港，有嘅，不過冇數碼，只有幾幢豪宅。至於西九文娛中心，本來係有嘅，後來變咗冇，家陣唔知到底有定冇。
好嘞，嚟到二○○九年，再有一個夢想破碎。政府話喎，由於金融海嘯咁咁咁，導致財務評估咁咁咁，加上土地分配咁咁咁，所以，香港仔漁人碼頭計劃無限期擱置！
忽然之間，冇晒夢想嘅香港人，一個二個變晒鹹魚。
唉，十年嘞，拖拖拉拉醞釀十年嘅漁人碼頭，到頭來竟然胎死腹中，難怪議員悲憤莫名，痛斥政府言而無信。其實，計功夫茶話齋，冇口齒唔講信用都仲係其次，成日都話官字兩個口㗎啦，漁人碼頭美夢落空有兩個更為嚴重嘅問題。第一，香港成日畀遊客批評缺乏景點，以後仲有乜嘢賣點？第二，失業率係咁升呀升，建造業係咁嗌救命，失業工人一心諗住去漁人碼頭地盤開工搵兩餐啦，咁就慘嘞，呢個夢想又係卜一聲幻滅，失業工人又係變晒鹹魚。
呢嗱嗱嗱，名副其實真係變鹹魚㗎。早幾日之嘛，有一個六十歲左右嘅地盤工人，失業兩個月嘞，冇辦法養得起三代同堂一家人，走投無路之下去咗青衣山頭吊頸自殺。
最新嘅失業率係百分之五點二，十八萬七千二百人冇工開，重災區之一係建造業。根據官方講法，建造業嘅失業率係百分之十一點二，而據業內人士所講，冇工開嘅真正比例高達兩成。
眾所周知，全世界嘅救市措施不外乎由政府帶頭展開各類型基建工程，只要地盤砰砰嘭嘭開動機器，周邊嘅生意都可以帶旺。吖，整鬼佢吖，香港政府居然反其道而行，唔去加碼新增基建不特止，仲要落井下石將原有基建一筆勾銷，功夫茶真係想問一問財政司司長曾俊華，你到底有冇誠意創造就業機會㗎？
提起曾俊華，今日立法會嘅重頭戲係投票決定係咪通過佢嘅財政預算案。由於鬍鬚曾交出一份被稱為「史上最衰」嘅孤寒預算，救市救人嘅措施似有還無，事前好多議員講到明，一定會投反對票。假如，萬一，好話唔好聽，立法會史無前例否決預算案，咁就大大劑嘞，香港將會出現憲制危機。乜嘢危機呀？再協商唔掂，特首可以解散立法會進行重選，重新選出嘅議員假如再一次否決預算案，更加大大大大劑，特首必須執包袱落台！
如果搞到連特首都要加入失業大軍，香港呢條鹹魚唔使奢望翻生咯！