爭住習舞
貧賤夫妻百事哀，經濟唔好，家庭問題一定多，懶理係富豪定草根，生活質素下降，假如夫妻雙方唔識得體諒，遲早玩完。
美國正因為呢個問題而非常頭痕，好似紐約呢個金融中心，當年係威係勢，點知一夜玩完，報紙日日話嗰度有不少專才要掛住紙牌搵工，情況就同街頭派傳單嘅阿姐無兩樣。搞到咁陰功，返到屋企又點會好心情，莫講話同老婆曳曳，直情想搵佢出氣，多得艷舞團體打救，令一般面臨離婚邊緣嘅夫妻有機會重生。
原來呢個艷舞團體，向來都係教授職業艷舞，讓有志者可成為艷舞女郎，教授方式同授舞無分別，以小班形式授課，話明係艷舞，當然會剝衫，所以唔係有急切需要，一般婦女根本唔會學，加上外界戴上有色眼鏡嘅目光，難怪女人經過門口都行快兩步。但風水輪流轉，今日呢個艷舞訓練班就排晒長龍，女人為咗跳艷舞，通宵去霸位都心甘情願。
排隊報名
當年歧視艷舞女郎，今日師奶爭住學，無非係因為兩餐，但艷舞團體就解釋，並非每一位女士都利用跳艷舞搵食，大部分都只係想滿足伴侶，導師Korri話：「好多家庭因為老公失業，老婆為咗幫補家計，惟有跳艷舞賺快錢，雖然未必每個男人都可以接受，但做人始終要面對現實，每日都要生活，冇錢就會產生好多家庭問題，作為妻子為咗慰藉丈夫，於是就偷偷哋嚟學！」現時各大以艷舞團體開班嘅機構都爆滿，部分有名氣嘅，更要租用能同時容納二百名學員嘅巨大場地至可以開班，真誇張！
之不過Korri就強調，跳艷舞本身唔係色情，純粹係過程能有效挑起男士性慾，令雙方如魚得水，但大家唔去理解，至有咁嘅誤會啫！跳艷舞身形並非最重要，反而心態至係首要，Korri話：「其實好多師奶因為生兒育女過後，難免會較肥胖，所以怕跳艷舞等同獻醜。其實如果只表演畀另一半睇，對方早已清楚你每一吋肌膚，根本問題不大，反而跳艷舞最終目的係為對方解決需要，所以你必定要有一種挑戰精神，使盡渾身解數，激起自己情慾盡情舞動，至可以挑逗到對方作出回應。」
挑逗伴侶
導師話呢個訓練班同一般艷舞訓練唔同，咁究竟又有咩學呢？Korri話：「第一，大家要了解清楚，一般艷舞女郎只會挑動對方情緒，唔會同對方解決，加上同一時間面對大班觀眾，動作會較激，否則好難帶領氣氛；其次，跳艷舞不代表鋼管舞，但基於要做出高難度動作，艷舞女郎有需要利用鋼管表演，至於師奶艷舞就集中表現女人味，理由係夫妻相處太久，男女角色大家都遺忘咗，要令男人記起女人嗰種溫柔，就要識得表現女性特徵。」
一位已畢業嘅學員Jeeka，就表示好開心能參加呢個訓練班，因為挽救到佢段婚姻，Jeeka話：「我今年三十四歲，身材普通，結婚八年來都係家庭主婦，由於一直過着少奶生活，直到老公失業，我根本完全幫唔到手，令佢抱怨我無用，於是我膽粗粗去學艷舞，果然令老公起死回生，依家佢每晚都要我跳，更開始好努力搵工添！」簡直霎時感動嘅精彩故事，可惜亦有學員投訴，呢個艷舞班一啲都唔「艷舞」，同幻想出入好大，中途退學嘅Kayden話：「淨係由頭到腳不停扭，我睇四仔都識啦，我要嘅係職業艷舞女郎嗰套嘛！」對於艷舞，師奶有讚有彈，但肯定嘅一點係，為期一個月嘅艷舞班，學費居然要一千美元，即八千港元，最發肯定係教嗰個！
撰文：祖