練馬師賽馬團體計劃已經成為愛好養馬人士嘅新潮流，因為買馬可運用嘅資金大咗，自然可以夾份買啲更高質素嘅良駒，據馬會公布最新數字顯示，截至今年四月為止，以團體形式養馬嘅團體共有二百二十四個，較去年同期增加百分之十六。
傳聞身價達八位數字嘅「閒話一句」月前勝出香港打吡大賽，自然成為咗呢個計劃之下嘅一個好例子，資深馬主黃良柏話，夾份養馬樂趣多，贏馬嘅時候可以多啲人一齊慶祝，特別熱鬧，而且皮費比較划算，以佢同何鴻燊姪女藍潔嫻等共七人養馬為例，每人每個月只需畀五千蚊就過足馬主癮，「閒話一句」上次捧走千二萬獎金，計落每人淨袋百幾萬，夠晒和味。
食過翻尋味嘅「閒話一句」，今個月二十六日又會喺沙田馬場代表香港出戰「冠軍一哩賽」，同場仲有應屆香港馬王「好爸爸」以及其他本地及海外名駒，若然「閒話一句」成功冧莊跑到第一名，馬主仲將可以分得高達四百七十幾萬銀獎金。
馬會發言人就話，以個人名義養馬每人最多只可養四匹，但以團體會員形式飼養，養夠十幾隻都冇問題，變相增加贏馬機會，聽落又似乎抵好多喎。