為針對國務院早前公布支持上海喺二○二○年發展成國際金融同航運中心，為免香港被進一步邊緣化，由行政會議召集人梁振英（CY）一手創立嘅一國兩制研究中心尋日發布「香港國際航運中心的轉型與升級」研究報告，建議政府將香港發展成亞太區一站式航運服務中心及以法定機構形式建立航運交易所。CY尋日預早半個鐘頭畀傳媒閱覽報告，之後至開記者會。
一國兩制研究中心份報告明顯要香港同上海打對台，指出如果香港真係要做亞洲航運中心，就要得到中央大力支持。早前有傳CY有意競逐下屆特首選舉，雖然佢曾經一口否定，但佢尋日就以「推銷員」自居，話「我可以做個好好嘅推銷員」，向中央硬銷香港成為航運中心嘅優勢，爭取中央支持，後來又補一句「做推銷員唔一定為咗選特首嘅」，又話「呢個場合唔講選特首嘅事」，總之留低一個好大嘅想像空間，畀大家猜謎！