「心經簡林」創作人兼國學大師饒宗頤尋日獲藝術發展局頒發最高榮譽嘅「終身成就獎」，年屆九十三歲嘅饒老寶刀未老，拐杖都唔使揸，輕鬆上台領獎。饒老可謂人老心不老，佢勉勵年輕藝術家要有一股熱力，要不斷追求創新。
藝發局尋日頒發六個獎項，嘉許本地多個傑出藝術家及團體。饒老以畢生致力漢學研究及藝術創作，成就獲大會肯定，佢開金口分享得獎感受，話搞藝術嘅人要具備一種印度人所講嘅「Tapas」，即係不怕艱苦不斷創新，咁至可以喺自己嘅創作天地發揮耀眼光芒。
饒老身為「潮州之寶」，佢得獎令一眾「潮州冷」都顏面有光，潮州商會會長許學之率領一眾鄉里包括前全國人大代表陳有慶等人齊撐場。
只見喺泰國有唔少家族生意嘅陳有慶，身邊突然多咗個啹喀保鏢跟到實，唔通係擔心泰國動亂會燒到埋身？陳有慶搖頭話，個保鏢請咗一段時間，同泰國示威冇關，只係自覺年紀大，家人驚佢容易跌親，請個保鏢照顧吓佢喎。