醉心書法嘅全國政協委員施子清，尋日喺科技大學搞咗個名為「子清墨韻」嘅書法展，快將卸任嘅校長朱經武都賞面出席，校長透露近日展開「答謝之旅」，輪流走訪各間學校，向老友記「謝票」，答謝大家多年來嘅支持。謝票都要提前幾個月，朱校長人緣認真廣，怪唔得連美國德州政府同國防部都睇佢台戲，每年分別給予四百萬及一百萬美金研究經費，即使美國經濟陷入困境，但朱校長依然有經費做研究。
卓妮尋日都貢去欣賞書法展，朱校長自爆係書法家王羲之迷，小學開始學書法，所以手字都見得吓人。講到會否倣效政要搵專人教佢簽名，校長就話唔使嘞，皆因佢喺美國生活多年，外國人習慣將簽名當為證據，唔係一種藝術，所以佢冇介意過自己簽名係咪得體喎。
施子清養生靠書法
講番個書法展，施子清除咗展出五十六幅得意之作外，亦趁機同校長say goodbye，題字「春風一路」四個字送畀朱校長，祝佢順風順水到美國。施子清又分享書法心得，原來佢第一位老師就係施媽媽，六、七歲已經教佢寫字，可惜當年家貧，只可以清水為墨喺階磚上寫字，從此書法不離手，六十幾年來未停過練字，至今屋企已有逾千幅作品，隨時可以擺個小型書法展。
到底係乜嘢令佢對書法着迷？施子清話，佢習慣寫字前沖杯靚茶，靜下來全神貫注諗吓自己想寫乜，呢一刻心無雜念，心境平靜，係養生最佳秘訣喎。
食品嘉年華要補貼
同場仲有施子清二公子施榮懷，講起由佢揸旗嘅香港食品嘉年華終於煞科，到底生意如何？佢話展覽期間雖然發生炸彈疑雲影響人流，但十二日展期合共做咗五、六千萬生意，吸引近四十五萬入場人次，成績算唔錯。
但埋單計數，廠商會要補貼逾五十萬銀，唔及搞工展會咁好搵，但施榮懷話唔會因此氣餒，皆因佢睇見市民消費力仍然強勁，其中賣一百蚊四隻嘅熟鮑魚更係排晒長龍，不過如果下次再搞，就一定會加入埋賣消費品嘅攤檔，唔會獨沽一味賣食品喎。
卓妮