本文重點
立法會今日表決預算案，焦點係「鬍鬚曾」曾俊華會唔會禍不單行，除咗榮膺回歸以嚟最多反對票嘅預算案，仲順手打破埋贊成票最低嘅紀錄，污名永留青史。港府今日背城借一，據聞今日嘅戲軌都度埋，其中「林D9」林瑞麟身負歷史重任，萬一有建制派議員唔生性，出現走票危機，林D9就負責發言拉布拖時間，等政府狗仔隊有時間吹雞搵人。
鬍鬚曾呢份無料到預算案全城噓爆，極有可能硬接泛民廿二張反對票，加埋衞生服務界李國麟嘅棄權票，如無意外，鬍鬚曾應該可以打破○三年梁錦松攞廿一張反對票嘅紀錄。贊成票方面，依家表明支持嘅只得二十九票，低過梁錦松嘅三十三票，仲有七票未表態，包括工聯會四票、勞聯李鳳英、旅遊界謝偉俊同醫學界梁家騮，直至尋日，佢哋都話要睇過鬍鬚曾嘅表現先至作決定，即係話，鬍鬚曾仲未擺脫攞最低贊成票危機。
鬍鬚曾點樣拆解窘局，唔使變成回歸以嚟嘅最 財爺，近日成為政界茶餘飯後嘅吹水話題。有人話，只要鬍鬚曾今日語無倫次，特登辣㷫班泛民，以議員隨即忍唔住爆粗、掟蕉，咁政府就有藉口叫立法會主席向一、兩名泛民開刀，趕出議事堂，所以，鬍鬚曾想攞少幾張反對票唔難，反而，要箍實贊成票，更加如履薄冰，萬一有兩、三個建制派議員唔生性，開會中途離隊，趕唔切返嚟投票，咁就有好戲睇囉。
確保建制派歸位表決
據聞，港府為咗今日呢場箍票戰，嚴陣以待。按港府嘅如意算盤，立法會十一點開波，官員回應議員訴求，大約十二點半至一點進行二讀表決，部分建制派議員已經收到政府電話，叫佢哋呢個時間唔好外出醫肚，留喺議事堂投票先，至於最關鍵嘅三讀表決，政府預計會喺傍晚時分進行，又係叫大家就算約人食晚飯，都千祈唔好去咁遠，可以隨時趕返嚟投票。
港府仲預留咗一道撒手鐧，萬一有議員趕唔切歸位投票，喺阻截泛民修訂案中守尾門嘅林D9，就會施展拉布戰術，「人肉ＭＰ３」今日盡情發揮不停自動重播功能，直至所有支持票到位為止。今日有八項修訂都關政制及內地事務局嘅事，林D9有大把空間，因應情況將發言拉長縮短。
過去三年，泛民都喺預算案提修訂，要削減政制及內地事務局局長職位，即係要罷免林D9，理由係好簡單直接，就係批評林D9平時無所事事，林D9今日就要表現畀大家睇，佢對政府嘅貢獻係幾咁大呀！