目前正進行裝修工程的鑽石山殯儀館被發現未有妥善處理廢料。范先生指殯儀館旁空地，堆有大量裝修廢料多時，加上下雨流出的沙泥淤塞污水渠，導致該處環境十分惡劣，「殯儀館做緊裝修，搬咗好多沙泥同廢料出嚟，但係搬完又冇人理，搞到四周圍污糟邋遢！」
黃大仙區區議員胡志偉認為，殯儀館雖僱用裝修公司進行工程，但亦有責任監管清潔工作，「唔係請咗人裝修就可以闊佬懶理，都要睇吓佢哋有冇做好啲嘢，當然包括點樣處理廢料！」
負責管理鑽石山殯儀館的東華三院發言人承認，工程公司受天雨影響，未有即時清理堆積的垃圾。經反映後，工程公司已即時清理所有廢料，並承諾日後加強監管，避免堆放廢物。
食物環境衞生署發言人亦稱，已敦促裝修公司負責人清理廢料及沙泥，避免污水渠淤塞。
（人人做記者 ireport_00018767）