全世界嘅生命鬥士都係令人肅然起敬嘅，尤其係香港嘅生命鬥士，簡直係肅上加肅、敬上加敬，點解咁講？因為佢哋唔止要同生命搏鬥，更加要同庸醫搏鬥。一邊係天地不仁、以萬物為芻狗嘅生命，一邊係醫院無能、以病人為草芥嘅庸醫，兩面夾擊，腹背受敵，你話香港嘅生命鬥士係咪零舍值得致敬？
呢嗱嗱，等功夫茶講個古仔畀大家聽。有一位患上肌肉萎縮症被迫坐輪椅嘅陳家豪，唔理出出入入行動有幾咁唔方便，亦都唔理活動能力只限於十隻手指，仍然自強不息好好讀書，寒窗苦讀終於取得大學榮譽學位。
呢位生命鬥士，令功夫茶諗起英國偉大科學家霍金。
當你驚嘆一個人嘅意志力原來可以頑強成咁，慘劇發生嘞。陳家豪舊年五月由於肌肉萎縮情況惡化，吞唔到食物，所以去瑪麗醫院造咗一條胃喉，方便進食流質食物。到咗今年四月八日，胃喉唔知點解甩咗，家人將佢送去就近嘅東區醫院。
你估東區醫院嘅醫護人員有幾荒謬呢？佢哋最初夾硬將一條唔啱尺碼嘅胃喉插入去，造成多處損傷；事隔幾日，佢哋又以另一條胃喉再插，今次係硬生生插穿胃部！
好嘞，胃部受傷，隨時會感染致命嘅腹膜炎，可唔可以做手術補救呢？得唔係話唔得，問題係，身為肌肉萎縮症病人，一來未必適合全身麻醉，二來抵抗力相當弱，手術成功機會只有百分之十。大佬，機會得一成，即係九死一生啦，換轉係你，你敢唔敢博吖？所以，陳家豪嘅屋企人拒絕畀個乖仔做手術，目前唯一嘅希望係生命鬥士再鬥贏一次，以頑強嘅意志令到傷口自行愈合。眼見乖仔命懸一線，陳家豪嘅爸爸含淚痛斥：「真係好離譜！完全想像唔到點解可以發生呢啲情況，我一定要討回公道，追究到底！」
古仔講到呢度，大家同唔同意香港嘅生命鬥士特別令人敬佩？又要鬥生命，又要鬥庸醫，睇見都戥佢哋疲累。其實，可以咁講，所有幫襯公立醫院嘅病人，全部都係生命鬥士，求生意志弱少少都唔掂。你知啦，醫療事故真係無日無之㗎，啱啱又話荃灣戴麟趾夫人診所派錯藥，醫管局主席胡定旭又要道歉。計計埋埋，類似失誤個案真係多到唔記得係第幾單嘞，總而言之，一句講晒，死得人多！
計功夫茶話齋，全港生命鬥士站起來，絕對唔可以容許公立醫院繼續害死人，一於同佢哋鬥硬淨。點樣鬥呢？首先，保住自己條命，然後，鬥垮屢屢失職嘅食衞局局長周一嶽！