東亞運動會將於年尾舉行，各個獎牌背後除咗有運動員嘅汗水外，教練亦功不可沒，所以香港教練培訓委員會尋日特別舉行滙豐銀行慈善基金優秀教練選舉頒獎禮，向一眾教練致敬。
滙豐亞太區企業可持續發展總監區佩兒（Teresa）係主禮嘉賓之一，原來佢都係運動發燒友一名。Teresa話無論幾忙都好，一星期總會抽時間打兩次網球，因為佢堅信身體健康先會有健康嘅心靈，一個人如果身心都健康，做事就可以事半功倍喇。
Teresa斷斷續續跟教練學打網球已經八年，佢覺得一個好嘅教練除咗令學生技術提升外，仲要兼職輔導工作，協助學生解決生活上嘅難題。
身兼滙豐體育會主席嘅Teresa仲好鼓勵同事培養一人一運動，好似佢自己就視打網球為social game（社交遊戲），實行一邊鍛煉身體一邊同親人、朋友培養感情。
滙豐總經理梁高美懿下個月開始就會轉做「恒生一姐」，同梁太一齊做同事多年嘅Teresa就祝願梁太事業一帆風順，帶領恒生業務蒸蒸日上。