愛美係女人天性，原來男人都貪靚，前馬會行政總裁黃至剛就絕對係形象至上，日前膝頭哥動完手術拆線，黃Sir唔理醫生勸告，入馬場消遣時堅持唔篤拐杖，話靚仔最緊要，就算行唔到瞓低喺地下都唔用拐杖喎。
平日腰板挺直，西裝筆挺嘅黃Sir尋日由太太傍住現身跑馬地馬場，佢透露右腳膝關節半月板上周動過手術，傷口前日至拆線，但佢康復神速，尋日行起路嚟輕鬆瀟灑，一啲都唔似病人。不過黃太轉頭踢爆老公一個小秘密，話醫生建議佢休養個幾月至可以做運動，期間行路要用拐杖，避免膝頭哥太用力，不過黃Sir覺得「拐杖Look」令型男形象大打折扣，尋日入馬場見班老友記時點都唔揸拐杖，寧願繞住太太手臂借力。
問佢今季賭馬戰績如何，黃Sir剖白真情，話退休前做咗馬會行政總裁十一年，至今仍未摸索到贏馬必勝心得，唯一令佢睇通睇透嘅係，賭馬係一門藝術，唔係科學，所以冇必贏竅門，大家明未？