生意淡薄，不如賭博。經濟不景下，唔少市民都夢想一朝刀仔鋸大樹，發達上岸。馬會大董葉澍堃（Stephen）同唔少馬迷一樣，每逢賽馬日都鍾意賭兩手，順便考吓眼光，但近日賽馬結果如股市般變幻莫測，Stephen都話要的起心肝戒賭，慳番個錢。
Stephen都話要收山，睇怕大家一定好詫異，不過佢似乎戒賭唔戒睇，尋日照樣同太太及細仔瀚華現身馬場，仲叫公子攞埋幾支靚紅酒，睇嚟係招呼馬場好友。
Stephen一向識飲識食又熱愛烹飪，賭馬只不過為過吓癮，所以每次落注只限買幾百蚊，唔會賭身家，但人人賭馬都想贏錢，近年賽馬結果難料，通頂刨馬經都未必可以搵到食，Stephen有感而發，話佢都想戒賭喎。又係嘅，家陣時勢唔多好，都係少賭為妙。
同場仲有港交所主席夏佳理（Ron），尋日有個「香港交易所挑戰盃」，請夏太做頒獎嘉賓，太太雖然威到盡，但旺氣似乎益唔到老公，問阿Ron手風如何，佢皺晒眉擰晒頭快步閃，唔使問阿貴，投注都係鋪草皮居多。