本文重點
何鍾泰身為立法會雷曼事件專責調查小組嘅主席，每次聆訊前都要做大量工夫，好似睇文件、開會咁，早已忙到一頭煙。復活節假期，佢仲同一班工程界人士去咗四川地震最嚴重嘅汶川同北川視察各項工程嘅進度，總之要用盡所有時間。
要求做好防震
何鍾泰話佢首先去德陽市，視察正在興建嘅隔震小學，佢話國家要求樓宇要做到七度防震。
不過佢認為，學校經常都係災難時居民嘅避難所，所以要求小學做到八度隔震，一柱一頂上都鋪上用馬來西亞橡膠做嘅彈簧橡膠頂，非常嚴格。小學進度良好，相信可以趕及今年八月底開課。
除咗汶川，一行人仲去咗受地震破壞最嚴重嘅北川通口鎮視察。由於供水系統受到破壞，通口鎮嘅所有居民自地震後已經日日要用人力擔水入村，非常辛苦。
好彩一班香港工程師有份參與同監督嘅供水系統已經落成，令居民唔使再承受擔水之苦，何鍾泰當日就特登出席豎立紀念碑儀式，仲參觀咗鎮小學，帶埋一大批文具、水靴送畀學生，之後仲大家一齊跳舞添。